ලබුනෝරුවකන්ද නරිවාද ශාසන සමීක්ෂා 2019-01-05

නරිවාදී මාන්කඩවල නන්දරතන හිමි:

[ 00:34:33 ]
අපේ හාමුදුරුවනේ අපි දකිනවා, ඉතාමත්ම පැහැදිලිව, බුදුරජානන් වහන්සේ මේ රන්මසු, මිල මුදල් පරිහරණය සම්බන්ධයෙන් ශික්ෂාපද දේශනා කරලා තියෙනවා. හැබැයි වර්තමාන සමාජයේ, අපි ඒ පිළිබඳවත් කතා කරන්න ඕනැ පණ්ඩිත හාමුදුරුවනේ, වර්තමානය වන විට අපේ බහුතරයක් හාමුදුරුවන් වහන්සේලා මිල මුදල් පරිහරණය කරමිනුත් ඉන්නවා, යම් යම් අවශ්‍යතා, දුෂ්කරතාවයන් මත.

[ 00:35:09 ]
උන්වහන්සේලාගේ ජීවිතය පවත්වාගෙන යන්න මේ එන දහසක් දුෂ්කර කරදර මධ්‍යයේ, පවත්වාගෙන යෑම සඳහා මිල මුදල් පරිහරණය කළත්, ... ... . උන්වහන්සේලා ධර්මය විනය විනාශ කරන්න යන්නේ නෑ.

[ 00:36:14 ]
ඒක හාමුදුරුවනේ අද කෙරෙන දේ සහ ශාසන ධර්මය කියන එක අපි වෙනම තේරුම් ගත යුතු දේවල් නේ!

--

නරිවාදී අළුබෝමුල්ලේ ධම්මාලංකාර හිමි:

[ 00:38:06 ]
හාමුදුරුවෝ කිව්වා වගේ, කාලයාගේ ඇවෑමෙන්, යම් යම් හේතු කාරණා මත භික්ෂූන් වහන්සේට මුදල් පරිහරණය සිද්ධ කරන්න වෙලා තියෙනවා. අර කිව්වා වගේ අවංක භික්ෂූන් වහන්සේ නමක් ඒ ශික්ෂාපදය ඒ අයුරින් ඛණ්ඩනය උනත්, එය දොරටුවක් බවට පත්කරගන්නෑ තව තව ඇතුලට ගිහිල්ලා තව තව ශික්ෂාපද ඛණ්ඩනය කරන්න.

[ පාලි බසින් ]

යස්ස ඛො ගාමණි ජාතරූපරජතං කප්පති, පඤ්චපි තස්ස කාමගුණා කප්පන්ති. යස්ස පඤ්චකාමගුණා කප්පන්ති, එකංසෙනෙතං ගාමණි ධාරෙය්‍යාසි: අස්සමණධම්මො අසක්කියපුත්තියධම්මොති. අපිචාහං ගාමණි එවං වදාමි: තිණං තිණත්ථිකෙන පරියෙසිතබ්බං, දාරු දාරුත්ථිකෙන පරියෙසිතබ්බං, සකටං සකටත්ථිකෙන පරියෙසිතබ්බං පුරිසො පුරිසත්ථිකෙන පරියෙසිතබ්බො. නත්වෙවාහං ගාමණි කෙනචි පරියායෙන ජාතරූපරජතං සාදිතබ්බං පරියෙසිතබ්බන්ති වදාමීති.

[ සිංහල පරිවර්තනය ]

ගාමිණී, යමකුට රන්රිදී කැප වේ නම් ඔහුට පස්කම් ගුණ ම කැප වේ. යමකුට පස් කම්ගුණ කැප වේ නම් එකාන්තයෙන් අශ්‍රමණ ධර්ම ඇත්තෙක. අශාක්‍යපුත්‍රීය ධර්ම ඇත්තෙකැ යි මෙය දරන්නෙහි ය. ගාමිණී වැලි දු මම මෙසේ කියමි. තණවලින් ප්‍රයෝජන ඇත්තහු විසින් තණ සෙවිය යුතු ය. දැවවලින් ප්‍රයෝජන ඇත්තහු විසින් දැව සෙවිය යුතු ය. ගැලින් ප්‍රයෝජන ඇත්තහු විසින් ගැල සෙවිය යුතු ය. පුරුෂයාගෙන් ප්‍රයෝජන ඇත්තහු විසින් පුරුෂයා සෙවිය යුතු ය. ගාමිණී, කිසි අයුරකින් රන්රිදී ඉවසිය යුතු ය, සෙවිය යුතු යයි මම නො ම කියමි යි.